حالة أمل

اهو الحضري عملها

وجه وهو عايز يضحك علينا

ومشي تاني بعد مالكل اداله الوش الجبس

ماعلينا

دي كانت مقدمة بس لاني اكتشفت اني من ساعة ما الحضري مشي اول مرة وانا ماكتبتش تاني

هو سد نفسي والا ايه؟

معلش يعني مع احترامي

هو مين ده اللي يسد نفسي؟

انا لا ليا في الكورة ولا كنت اعرف مين هو الحضري اساسا غير لما سمعت الناس بتغني ارقص يا حضري واللي ماحدش حيغنيها تاني

امال انا قاعده باكتب ليه دلوقتي؟ ونفسي اتفتحت للكتابه ليه تاني؟

وايه اللي حصل الشهر اللي فات خلاني ما اكتبش؟

ابدا شوية مشاكل عائلية على امتحانات ما جاوبتش فيها كويس وجبت درجات وحشة لاني ماكنتش مذاكرة كويس (استاهل مش كدة؟) على حالة وفاه ربنا يرحمها برحمته ويجعل مثواها الجنة يارب ( ادعو معايا يا جماعة يمكن لما نموت ربن يهيأ لنا حد ما يعرفناش يدعيلنا برضه)

المهم اني انا نفسي مفتوحة وعندي حالة امل برغم كل الحاجات اللي حصلت وبتحصل

اصل الامل ده حاله مهما كانت الدنيا سودة حوالينا ممكن نبقى في حالة امل

احساس

سامعة حد بيقول دي جبلنة ( من جبلة يعني)

لا انا مدركة جدا لكل البلاوي اللي حوالينا

اللي على المستوى الفردي والعائلي والمحلي والعالمي

وكنت في حالة سدة نفس وقرف واكتئاب مالهمش حل

وكنت ما بفتحش الكمبيوتر اصلا طول الشهر اللي فات

دلوقتي انا عندي حالة امل وتفاؤل وسعادة

عندي امل في ربنا كبير

هتفرج انشاء الله هتفرج

ماهيا لما بتوصل اخرها كده

بتتحل انشاء الله

يارب كلكوا يبقى عندكم الامل والسعاده اللي عندي

ويفك كرب كل واحد مضايق وحزين

بس عارفين الروشته اللي انا جربتها كانت ايه؟

قوم اعمل اي عمل ايجابي

عارفة انها تقيلة قوي

وانك مانتخ على الكنبة قدام التليفزيون تقلب فيه وخلاص لمدة 12 ساعة في اليوم ونايم ال 12 ساعة التانيين

زي مانا كنت عاملة في عز اكتئابي

وعلى راي نادية لطفي

لولا ان قتل النفس خطيئة كنت قتلت نفسك ولانك عارف زيي ان اللي بينتحر بيروح النار

قوم اتحرك

رتب سريرك ووضب اوضتك ولم كراكيبك

خد دش دافي وادخل المطبخ اعمل سندويتش وكباية عصير

والبس وزور قرايبك واصحابك

دور على اي حد عايز يروح مشوار او يقضي مصلحة وروح معاه

لله

ماتخليش فيه حدود لا ارض ولا سما

امشي في الشارع وانت طاير مش ماشي

غمض عينيك عن كل الحاجات الوحشة اللي حواليك

وحاول تحليها ولو في مساحة متر مربع في محيطك

وان ماعرفتش بص للسما و لشجرة عالية

هتلاقي ان اللون الاخضر وهو بيحضن اللبني حلو قوي

شم نسمة الهوا الحلوة بتاعة اليومين دول واملا بيها صدرك

حس بيها على خدك وكفك

طلع ايدك سنة من شباك المكروباص وانت تحسها قوي

ما تطلعهاش كتير احسن الاوتوبيس اللي معدي من جنبك يلطشها

مايهمكش من حد وماتهتمش لراي حد

طالما مادي حق ربنا وحق الناس اللي ليهم حقوق عليك ومابتاذيش حد ماحدش له حاجة عندك

وحاول على قد ماتقدر تبقى حلو وتخلي كل حاجة حواليك حلوة

هتجيلك نفس الحالة اللي عندي

ربنا يديمها عليا حالة

ملحوظة

ماحدش يزعل مني عشان ماردتش عالتعليقات اللي فاتت

مانا كنت في حاله تانية بقى

وزمانكم نسيتوني اصلا

معلش