اللي مالهمش فيها

يوم ما الاهلي خسر كاس مش عارف ايه في افريقيا بقيت مستغربه قوي من الهم والغم اللي ركب الناس واللي زعلوا اكتر ما زعلو من الزيت اللي بقى بتسعه جنيه والرز اللي بقى بتلاته جنيه والعيش ابو ريال الرغيف اللي هو كمان بنقف عليه طوابير

وماكنتش الحقيقة فاهمة اما هما خسرو بطولة افريقيا امال رايحين غانا تاني يعملو ايه

لحد ما اللي فاهمين قالولي دي بطولة كاس افريقيا منتخبات اللي الاهلي خسرها كانت اندية ... آآآآآآآآآآآآه فهمت

اصل انا من اللي قال عليهم اعلان كوكاكولا "اللي مالهمش فيها بيشجعوا مصر"

الا اني ماكنتش باشجع مصر

لانه مش من المنطق اني اهلل واتمنى ان مصر تبقى الاولى في لعبة مهما بلغت شعبيتها وهيا الاخيرة في مليون حاجة تانية اهم

ولان كاس الامم الافريقية دي بالذات ليها ذكرى وحشة قوي معايا من ساعة يوم السبت بالليل في شهر فبراير برضه من سنتين لما كانت الجماهير الحمراء في استاد القاهرة بتصرخ من الفرحة وفي نفس الليلة كان الف مصري في البحر الاحمر بيصرخو من الرعب والموت

زائد اني ما بحبش الكورة اساسا وفعلا ماليش فيها .. وبكرهها عمى من يوم ماكنا نستنى ابويا يفسحنا واحنا صغيرين في يوم الاجازة ويقعد وما يرضاش عشان فيه ماتش كورة .. عقده من الطفوله يعني

دي مجرد لعبه في الاول والاخر ترفيهية .. وهنمشيها رياضية .. وتعتبر صناعه بتدخل ملايين بل مليارات للي بيستغلوها مش للجماهير العريضة اللي بتصرف عليها سواء في الفرجة عالقهاوي او في اشتراكات الفضائيات او في التذاكر ( 1800 جنيه سعر الذكرة ذهابا وايابا في مصر للطيران عشان تحضر ماتش النهائي في غانا وتشجع مصر) ..

لكن بالرغم عني باسمع وباعرف الاخبار من التليفزيون اللي بيتحول كل يوم على مواعيد برامج النميمة الرياضية من اول ماكان شوبير بيقدم برنامجه في دريم مرورا بالدرجة التالتة في التلفزيون المصري الرائد وانتهاءا بمودرن سبورت

وكان لفت انتباهي موضوع لاعب الاسماعيلي اللي اتنقل الاهلي فالاسماعلاوية عملوله نعش عشان خانهم وساب ناديه

طبعا انا اعتبرت ده افورة منهم ودراما مالهاش لازمة لانه اللاعب من دول بيلعب في الشارع الاول

وبعدين يشترك في مركز شباب حتتهم

وبعدين يدخل اختبارات الكورة في اي نادي في بلدهم

على امل ان ربنا ينفخ في صورته ويبعت له سمسار يرقيه في نادي احسن وهكذا

وعينه خلال كل ده عالاحتراف ..

ده التطور الطبيعي للموضوع..

وافتكرت انه من سنين كتيرة كده سمعت في الاخبار انه ناس من كولومبيا قتلوا لاعب في منتخبهم في كاس عالم تقريبا عشان ضيع كورة او حاجة زي كده

ففهمت ليه عصام الحضري خرج بالطريقة دي ومش هنقول هرب

هنقول خرج رغما عن انف ناديه اللي قال امبارح في التسجيل اللي اتذاع في قنوات التليفزيون كذا مرة انه له فضل عليه

ورغما عن انف جماهيره اللي بتعشقه واللي كلمة "ارقص يا حضري " كانت بترقص قلوبهم من جوه واللي كانو معتبرينه الفرعون اللي واقف اسد في الجون

ورغما عن القوانين المنظمة للعبة سواء البنود اللي خالفها والا اللي استغلها

ده حتى ضحى بمقابلة رئيس الوزراء اللي كان هيسلم عليه بايده النظيفة ونانسي عجرم اللي كانت هتغنيله شخصيا في حفلة التكريم

انا مش بالومه انه عايز يحترف بره في بلد نضيفة وجميله وغنية ومحترمة زي سويسرا ودي طبعا عكس مصر في كل حاجة

ولا بلومه انه عايز فلوس الراجل برضه عنده عيال عايزة تتربى وكيلو العتس بقى بتسعه جنيه بعد ماجبته من اسبوعين بس بسبعه

ولا بلومه لانه ساب الاهلي اللي اتحول لديانه موازية عند خمسة وستين مليون مصري من التمانين مليون زي ماهو قال .. الراجل برضه بقى عضمة كبيرة والسنتين والا التلاته اللي هيلعبهم في سويسرا يمكن هما اللي فاضلينله في ميادين النضال .. قصدي في الملاعب الخضراء

الكل اجمع انه من حقه يخرج ويحترف بس مش بالطريقة دي

مش انا ماليش فيها

بس لما سمعت الخبر..

انا زعلت

ولما سالت عيل عنده عشر سنين مجنون كورة واهلاوي موت والحضري وابو تريكه بالنسباله ماما وبابا وانور وجدي عن رايه قاللي والله جدع انه عمل كده مالنادي ماكانش راضي يسيبه ..

انا تفجعت

حتى العيل شايف انه الواحد لازم يشوف مصلحته مهما كانت الطريقة وطز كبيرة قوي في اي حاجة وكل حاجة

وخصوصا ان الحضري شايف انه ماعملش حاجة غلط وبرر عملته انه ما قصرش وانه ادى حياته كلها لمصر
وللاهلي

يعني ماحدش له عندي حاجة واللي يعرف ابويا يروح يقوله

الحضري قال انه بيتمنى يتعرف على جماهير نادي سيون ويفرحهم ويرسم البسمه على وجوههم زي ما رسمها على وجوه جماهير الاهلي

مانستغربش .. ماهو في الاول وفي الاخر الولاء للفانله زي ما اتعلمنا من عمهم الكبير حسام حسن لما ساب الاهلي وراح الزمالك في نقله عقائدية كروية كبيرة وطبعا حسام كان ليه ظروفه اللي خلته بعد كده يروح المصري ودلوقتي مش عارفة هو فين الحقيقة لان اخبار اللعيبه الصغيرين غطت عليه بس اعتقد انه لو استمر يلعب يمكن هنلاقيه بعد كده في نادي الطالبية الرياضي

ياترى جماهير سيون هتغنيلك ارقص يا حضري؟

الحضري ماكانش محتاج فلوس للدرجة دي واخبار مكافات اللعيبه وتبرعات رجال الاعمال الوطنيين ليهم بارقام مش خافيه على حد.. مش زي اللي رمو نفسهم في البحر عشان يوصلوا اوروبا عشان يجيبوا فلوس .. الفلوس كانت بتيجي لحد عنده

وضعه في مصر وبرستيجه وحب الناس ليه يمشيله حاله كويس قوي مش زي اي حد عادي مالوش ضهر ولا اسم ولا شهرة ولا فلوس بيتمرمط ويتبهدل عشان ياخد ابسط حقوقه وما بياخدهاش

وحتى لو اعتزل بعد ما يكبر اكتر من كده كان هيلاقي ستين سبوبة سواء مذيع زي مصطفى عبده او مدرب زي حسن شحاته او عضو مجلس ادارة زي الخطيب او معلق زي مدحت شلبي او معلق ومذيع وعضو مجلس ادارة نادي وعضو اتحاد كورة وعضو مجلس شعب زي شوبير

ماكانش هيغلب يعني

بس زي ماقلت ده التطور الطبيعي للحاجة الساقعة .. بجد حاجة ساقعة

ومش مشكله مسيره يرجع برضة والناس تنسى ويرفعوه على رقابيهم وياخد كل اللي فات ده زي ما رفعوا تامر حسني بعد ما خرج مالسجن وخد وضعه تاني تالت ومتلت مع الفارق بين الحالتين

مش انا ماليش فيها؟

لكن زعلي ده له مايبرره

ماهو لما نرفع شوية رجاله.. مع احترامي ليهم جميعا .. لعيبه .. بيجروا ورا كورة

لما ترفعهم لمستوى المجاهدين اللي رفعوا راس مصر عالية في القارة السوداء

واما تغنيلهم :

ماشافش الرجال

السمر الشداد

فوق كل المحن

وماشافش العناد

في عيون الولاد

وتحدي الزمن

اصله ماعداش على مصر

لما نغنيلهم اغنيه اتعملت بعد انتصار مصر على اسرائيل في حرب

ولما نساوي العرق اللي سال منهم على النجيله الخضرا في غانا

بالدم اللي سال من الشهداء على الرملة الصفرا في سينا

يبقى ما نستغربش لما البعض يرفع خروج عصام الحضري بالطريقه دي لمستوى الخيانه

يا حبيبتي يامصر يا مصر

يا حبيبتي يامصر يا مصر

يا حبيتي يا مصر

يا مصر

!!!!!!!!!!!!!