تاني عنوة واقتدارا

أولا:اذكر عشرة أشياء عن نفسك

ثانيا:اختر خمس أشخاص تهدى لهم التاج

ثالثا:لا تهدى التاج لمن أهداه إليك

رابعا:عرف اللي بعتلك التاج انك نزلته عندك

باينني طفسة تاجات
كل ما اشوف تاج يعجبني آخده
حتى لو ما حدش اهداهولي
بس انا لقيت ان التاج ده مهم بالنسبه لي
انا خدت التاج من عند دوبا وقلتلها
وفعلا ناس كتير جاوبته

عايزة اتكلم عن نفسي شوية
شويتين زياده يعني
عايزة اسيب نفسي شوية على سجيتها
لاني اتخنقت من قناع الجمود والرزانه والعقل الزياده اللي انا لابساه على طول
ده مش معناه اني عبيطة والا روشة والا متهورة او مستهترة
لكني
حالة وسط
مش حل وسط
وفيه فرق
لان الحل الوسط بالجأله مرغمة
اما الحالة الوسط
فهي الوضع المتعادل للحياه من وجهة نظري
لا عالي ولا واطي
لا صعب ولا سهل
لا فقير ولا غني
لا اول ولا آخر
لا سالب ولا موجب
طول عمري اقول على نفسي متعادلة
مع نفسي ومع الدنيا
طول عمري حاسة اني مطالبي من الدنيا بسيطة وعادية
لا انا طالبة الكل والكمال ومنتهى الاشياء
ولا انا زاهده في كل شئ
مقتنعة ان ربنا خلقنا في الدنيا عشان نعبده
وكمان عشان نعيش
في الاخر هنموت
وهنرجعله سبحانه باعمالنا ان خيرا فخير وان شرا فشر
ربناخلق الدنيا بالحلو والوحش
بالظلم والعدل
بالنعم والنقم
هتجيلي النعمه هافرح بيها وازاطط اوي
وهتجيني النقمة والمصيبة والبلاء والطعنه في الضهر او في الوش كمان
هازعل واعيط وانكسر وانهار
واقعد جنب الحيطه مش عايزة اشوف حد ولا حد يشوفني ولا اكلم حد ولا حد يكلمني ولا اعمل حاجة ابدا
لكني باقوم تاني
بصعوبة كبيرة الحقيقة
متعلمة حاجة جديدة
واقفة كما
النخل باصص للسما
بالبس الكوتشي بتاعي والبنطلون
وامشي على الارض طايرة
وادعي على اللي اخترع الكعب العالي والفستان للستات
مش استرجال والله
لكن احساس بحرية حركة منغير تقييد
ونفسي اجري في مكان مفتوح
لكن قلة الحركة والسن بتخلي نفسي ينقطع بسرعة
زائد ان مافيش مكان مفتوح
بحب التلقائية قوي
برغم اني باضطر احبس مشاعري واخنق الكلام في حلقي عشان الاصول الاجتماعية والتقاليد العائلية
بفتقد ميزة مهمة جدا
وهي الذكاء الاجتماعي
فاكرة ربنا عل قد ماقدر
بادعيله ما يسيبنيش لا لنفسي ولا لحد
انا كبرت
انا مش بنت صغيرة
انا زوجة وام لطفلين ومسئولة وعليا التزامات تجاه عيلتي الصغيرة واهلي
انا عندي النهاردة 33 سنة و6 شهور و5 ايام
لكن انا جوايا مقتنعه انه عندي 16 سنه بس
لسة عندي احلام كتيرة نفسي احققها
وكتب كتيرة نفسي اقراها
وحاجات كتيرة نفسي اتعلمها
واماكن كتيرة نفسي اشوفها
وناس كتيرة نفسي اعرفها
برغم مسئولياتي الكبيرة
ووقتي اللي مش ملكي
وامكانياتي اللي مش هايلة
لكن عندي امل ان في يوم هاكون زي مانا نفسي اكون