يا تبصو تحت يا تبصو فوق

من تلات اربع اسابيع سمعت انه تم تغيير عربات السيدات في المترو وبقوا نمرة 4 و5 بدلا من 1و 2

وما عرفتش السبب

قلت احنا هنقعد نعد العربيات

قالولي لا ما هما ملونين العربية الل شغاله سيدات طول اليوم بخطين حمر من فوق البيبان

والعربية التانية لونوها بخطين خضر وعملوها لحد الساعة 9 بدل 6 مساء – ياللا يا ستات انبسطوا –

وكمان للي مش بيشعلق راسه فوق ومش بيبص على البيبان

ممكن يبص عالارض هيلاقي الرصيف قدام عربات السيدات مخطط احمر

يعني مالكوش حجة

يا تبصو تحت يا تبصو فوق

احتجت اركب المترو

نزلت المحطة لقيت المترو ماجاش

فضلت ماشية ابص عالارض عشان اشوف التخطيط الاحمر على الرصيف لحد ما لقيته

وووقفت زي اي بنت شاطرة بتسمع الكلام استنى في المكان الصح

الساعة كانت 8 مساء

وجه المترو

وقدام ماوقفت فتح الباب

لقيت العربية متروسة رجالة

وفيها كام ست كدة

قلت يمكن السواق ماوقفش العربية 4 و5 قدام الخط الاحمر بتاع الرصيف

اضطريت ابص فوق

لقيت العربية متخططه احمر من فوق الباب

ومكتوب عليها بالبنط العريض للسيدات

ركبت بسرعة قبل الباب ما يقفل وقلت انا صح يمكن هما ما يعرفوش

بس ما فتحتش بقي

اصلي باكسف

شوية ولقت اللي قاعدين بيتكلمو مع بعض في الموضوع

يعني مانتو عارفين اهه

الي يقول ما هما بيركبو معانا في عربياتنا

واللي يقول هما غيروها ليه هو احنا هنمشي نعد واللا ندور عالخط الاحمر

واللي يقول يا عم نفض

المحطة اللي بعدها بنات وستات ركبو

وبنت طلعت تتبص حواليها وتقول هما لغوها خالص والا ايه؟

قلت لها لأ بس الناس منفضة

وفيه بنت تانية وقفت تناقش الشاب اللي قاعد عن سبب تغيير العربة وازاي من حق الستات ان يبقى ليهم عربة وان غلط انه يركب هنا وتدافع عن وجهة نظرها

عدت محطة والشاويش اللي عالرصيف مشي يقول في غرامات في المحطة الجاية

الكل اتريق عليه

المحطة الجاية كانت الاوبرا

اللي ماحدش بينزل فيها ولا يركب منها

وقبل ما ندخل على السادات

السواق قال في الميكروفون

العربة الرابعة والخامسة للسيدات فقط

وفي السادات كله نزل جري

وفيه رجاله ما لحقتش تنزل والباب قفل

ماهم كانو كتير قوي

وفيه راجل شكله كده اجنبي مش من هنا لما لقى العربية كلها بقت ستات وما بيركبش لا ستات بعد ما فضيت من الرجاله بقى عمال رايح جاي في العربيه وعلى وشه ابتسامة مش فاهمة لحد مانزل

وكل ما المترو يقف في محطة يكونو رجاله وستات واقفين على الرصيف قدام العربية 4 و5 .. الستات تركب والرجاله تجري يمين وشمال

كام منظر يهلك مالضحك

الخلاصة ان ما حدش من الستات اللي ركبوا ومنهم انا اتكلم الا واحده وكان كلامها على شكل حوار جانبي

مافيش واحده ومنهم انا قدرت تفتح بقها وتدافع عن حقها

واللي هيقول حقها في ايه اقوله حقها في عربية موفرهالها شركة المترو منغير ماحد يزاحمها ولا يضايقها

وان كان فيه ستات بتتنازل عن الحق ده وتركب عربية الرجاله عشان :

مالحقتش توصل عربية الستات وخايفة المترو يفوتها فنطت في اي عربية بدل ما تستنى المترو اللي جاي

او مكسلة تمشي لعربية الستات

او طمعانة ان فيه شاب هيقف ويقعدها مكانه عشان الستات ما عندهمش دم وما بيقفوش لبعض

ودي كدبة

احنا بقف لست كبيرة او ست شايله عيل

انما لما تبقى شابة وقادرة تقف اقوم لها ليه وتقوم لي ليه؟

انا عايزة اركب عربية ستات عشان ماتزنقش واتبهدل

ماحنا بنتبهدل في الاوتوبيسات والميني باصات والميكروباصات

يقوم لما ربنا يبعتلنا حته مواصلة واحده ما نتبهدلش فيها اتنازل عنها

انا عايزة اركب عربية السيدات اللي بنبص فيها لبعض من فوق لتحت وكل واحدة تتامل في لبس التانية وتسريحتها او طرحتها ونعايب على بعض في سرنا

انا عايزة اركب عربة السيدات اللي اتحولت ل Ladies' Room كبيرة بيزبطو فيها المكياج ويعدلو الطرحة ويسرحو شعرهم

انا عايزة اركب عربية السيدات اللي بتطلع فيها واحده تبيع دبابيس حجاب بنص جنيه واقلام تحديد باتنين جنيه

وعلى راي نيللي زمان

حقققققققققققققققققيييييييييييييييييييييي ومافرطفوهشي