تاج خالو

انا ما اتعزمتش عالتاج ده
بس خدته عنوة واقتدارا
اصله عجبني
بيتهيالي ماحدش هيمانع
شكرا لخالو الصباغ

1
هل توافق على حزف خانة الديانة من البطاقة الشخصية ؟

لا لانها مهمة في كل التعاملات الرسمية

اما التعاملات الغير رسمية فانا بعامل اللي حواليا من منطلق انساني منغير ماشغل بالي ديانتهم ايه

اللي عايز يتعامل عادي بيتعامل عادي

واللي عايز يقفش بيقفش

وكلنا في الآخر بنعامل ربنا

2
ما رأيك فى المثليين ؟ هل هى حرية شخصية ؟ هل توافق على الإعتراف بالمثليين ؟ هل لديك أصدقاء من المثليين ؟
-المثلية جريمه ربنا قلب بسببها بلد بحالها وعاقبها اقسى عقاب بعته على ناس في التاريخ (فجعلنا عاليها سافلها وامطرنا عليهم حجارة من سجيل)

يبقى ازاي يبقى لينا حرية موافقة عليها بعد كلام ربنا

-لا ما اعترفش بيهم الا انهم مجرمين في حق نفسهم وحق ربنا وحق الانسانية اللي بوظو فطرتها السليمة

ده حتى الحيوانات ما بتعملش كده

-بعد كل اللي قلته ده يبقالي اصدقاء منهم؟
3
هل تعتقد بوجود إضطهاد للمسيحين فى مصر ؟
لو فيه اضطهاد يبقى احنا كلنا بنضطهد بعض

احنا اللي نفوسنا وحشة مع بعض

مش بنفرق بين مسلم ومسيحي

وبرضه لسه فيه ناس كتير بتتعامل بالانسانية مش بالديانه
4
من هو الشخص الذى تختارة لرئاسة مصر ؟
اسامه الغزالي حرب
5
أذا قمت بتأسيس حزب سياسى .. من هم الأشخاص الذين ستقوم بضمهم فى الحزب ليشاركوك فى حكم مصر حال فوزك فى الإنتخابات ؟ هل توافق على مشاركة كل من : الإخوان المسلمين - الأقباط فى الحكم ؟
العلماء

هم بس اللي يقدرو يقومو البلد دي تاني

اي حد تثبت كفاءته واخلاصه للبلد يشارك في الحكم

حتى لو من جزر واق الواق
6
فى رأيك الشخصى .. ما هى أفضل مدونة على بلوجر قمت بزيارتها ؟

عصفور المدينة لتنوعها ومواضيعها الدينية المعتدلة

عيل مصري لصدقها واحساسها

خالو للبهجة اللي بتبعتها في نفسي

خيخة واي كلام لقربها من قلبي

7
للإناث فقط : هل توافقين على الزواج من رجل مطلق ؟
اولا: لازم الاول اعرف سبب الطلاق

يعني مش واحد مراته مطلقة منه عشان بيضربها واوافق عليه

ثانيا : لو فيه توافق عاطفي وقبول نفسي اوافق

ثالثا: افضل ان اصحاب الظروف اللي زي بعض

يتجوزو بعض

لانهم اقدر على فهم بعض والاحساس ببعض
8
اذا تزوجت وأنجبت ولدين وبنتين .. أى الأسماء تحب أن تسمى ؟
ادهم ومازن

امل واميرة

بس اربعه ده كتير شوية

امال فين اسال استشير
9
هل تعتقد أن توريث الحكم فى مصر . . سيتم فعلا أم لا ؟
لأ

لاني مش متخيله ان واحد يسيب البلد

تتخرب

وتتنهب

وتتحلب

وبعدين يقعد على تلها
10
فى رأيك الشخصى : ماهو أفضل إنجاز لحكومة مبارك ؟ وما هو أسوأ عمل قامت به ؟

افضل انجاز المترو

اسوأ انجاز

.....

عند حضرتك وقت اكمل

تحديث

اصل خالو قال عايز اجابات مختصرة
وسؤال اضطهاد المسيحيين ناقشيتني فيه
appy
قلت ارد عليه هنا باستفاضة

اما موضوع المسيحين
فعلى مستوى السلطة مهماش مضطهدين
البابا شنوده ماحدش يقدر يقريله
مش زي اي خطيب جامع ممكن يروح ورا الشمس اوشيخ ازهر مابيتكلمش الا بالاذن

وزير مهم جدا هو وزير المالية المتحكم في كل جنيه يدخل جيبي وجيبك مسيحي

اكبر ملياردير في البلد ساويرس وونسبة كبيرة من اهم رجال الاعمال في البلد مسيحيين

انا مش باقر عليهم انا عارفة كويس انهم مجتهدين

اما على مستوى المواطن العادي زيي وزيك فاحنا مش بس بنضطهد بعض
حنا بناكل بعض وبننهش بعض
ما بنفرقش بين مسلم ومسيحي
لما الاسعار بتغلى بتغلى عالكل
ولما التعليم بيتخرب بيتخرب على الكل
ولما الادوية بتتغش بتتغش عالكل
ولما الدنيا بتطربق بتطربق على الكل
لما بتقوم فتنه كل شوية بين مسلمين ومسيحيين هنا والا هنا تفتكري بيضربوا في بعض ويكسرو مساجد وكنايس عشان غيرانين على الدين
ابدا
ده عنف وغضب مكبوت بيطلعوه على بعض
ماطول عمرهم عايشين مع بعض من 1400 سنه
اشمعنى دلوقتي ظهرت كلمة اضطهاد
الفترة اللي احنا عايشين فيها هيا اللي مضطهدانا كلنا
وما نصدق عركة وخناقة الا وكله يمد ايده
عشان مكتومين وعايزين ننفجر
مسلمين ومسيحيين ويمكن ملحدين كمان

يا تبصو تحت يا تبصو فوق

من تلات اربع اسابيع سمعت انه تم تغيير عربات السيدات في المترو وبقوا نمرة 4 و5 بدلا من 1و 2

وما عرفتش السبب

قلت احنا هنقعد نعد العربيات

قالولي لا ما هما ملونين العربية الل شغاله سيدات طول اليوم بخطين حمر من فوق البيبان

والعربية التانية لونوها بخطين خضر وعملوها لحد الساعة 9 بدل 6 مساء – ياللا يا ستات انبسطوا –

وكمان للي مش بيشعلق راسه فوق ومش بيبص على البيبان

ممكن يبص عالارض هيلاقي الرصيف قدام عربات السيدات مخطط احمر

يعني مالكوش حجة

يا تبصو تحت يا تبصو فوق

احتجت اركب المترو

نزلت المحطة لقيت المترو ماجاش

فضلت ماشية ابص عالارض عشان اشوف التخطيط الاحمر على الرصيف لحد ما لقيته

وووقفت زي اي بنت شاطرة بتسمع الكلام استنى في المكان الصح

الساعة كانت 8 مساء

وجه المترو

وقدام ماوقفت فتح الباب

لقيت العربية متروسة رجالة

وفيها كام ست كدة

قلت يمكن السواق ماوقفش العربية 4 و5 قدام الخط الاحمر بتاع الرصيف

اضطريت ابص فوق

لقيت العربية متخططه احمر من فوق الباب

ومكتوب عليها بالبنط العريض للسيدات

ركبت بسرعة قبل الباب ما يقفل وقلت انا صح يمكن هما ما يعرفوش

بس ما فتحتش بقي

اصلي باكسف

شوية ولقت اللي قاعدين بيتكلمو مع بعض في الموضوع

يعني مانتو عارفين اهه

الي يقول ما هما بيركبو معانا في عربياتنا

واللي يقول هما غيروها ليه هو احنا هنمشي نعد واللا ندور عالخط الاحمر

واللي يقول يا عم نفض

المحطة اللي بعدها بنات وستات ركبو

وبنت طلعت تتبص حواليها وتقول هما لغوها خالص والا ايه؟

قلت لها لأ بس الناس منفضة

وفيه بنت تانية وقفت تناقش الشاب اللي قاعد عن سبب تغيير العربة وازاي من حق الستات ان يبقى ليهم عربة وان غلط انه يركب هنا وتدافع عن وجهة نظرها

عدت محطة والشاويش اللي عالرصيف مشي يقول في غرامات في المحطة الجاية

الكل اتريق عليه

المحطة الجاية كانت الاوبرا

اللي ماحدش بينزل فيها ولا يركب منها

وقبل ما ندخل على السادات

السواق قال في الميكروفون

العربة الرابعة والخامسة للسيدات فقط

وفي السادات كله نزل جري

وفيه رجاله ما لحقتش تنزل والباب قفل

ماهم كانو كتير قوي

وفيه راجل شكله كده اجنبي مش من هنا لما لقى العربية كلها بقت ستات وما بيركبش لا ستات بعد ما فضيت من الرجاله بقى عمال رايح جاي في العربيه وعلى وشه ابتسامة مش فاهمة لحد مانزل

وكل ما المترو يقف في محطة يكونو رجاله وستات واقفين على الرصيف قدام العربية 4 و5 .. الستات تركب والرجاله تجري يمين وشمال

كام منظر يهلك مالضحك

الخلاصة ان ما حدش من الستات اللي ركبوا ومنهم انا اتكلم الا واحده وكان كلامها على شكل حوار جانبي

مافيش واحده ومنهم انا قدرت تفتح بقها وتدافع عن حقها

واللي هيقول حقها في ايه اقوله حقها في عربية موفرهالها شركة المترو منغير ماحد يزاحمها ولا يضايقها

وان كان فيه ستات بتتنازل عن الحق ده وتركب عربية الرجاله عشان :

مالحقتش توصل عربية الستات وخايفة المترو يفوتها فنطت في اي عربية بدل ما تستنى المترو اللي جاي

او مكسلة تمشي لعربية الستات

او طمعانة ان فيه شاب هيقف ويقعدها مكانه عشان الستات ما عندهمش دم وما بيقفوش لبعض

ودي كدبة

احنا بقف لست كبيرة او ست شايله عيل

انما لما تبقى شابة وقادرة تقف اقوم لها ليه وتقوم لي ليه؟

انا عايزة اركب عربية ستات عشان ماتزنقش واتبهدل

ماحنا بنتبهدل في الاوتوبيسات والميني باصات والميكروباصات

يقوم لما ربنا يبعتلنا حته مواصلة واحده ما نتبهدلش فيها اتنازل عنها

انا عايزة اركب عربية السيدات اللي بنبص فيها لبعض من فوق لتحت وكل واحدة تتامل في لبس التانية وتسريحتها او طرحتها ونعايب على بعض في سرنا

انا عايزة اركب عربة السيدات اللي اتحولت ل Ladies' Room كبيرة بيزبطو فيها المكياج ويعدلو الطرحة ويسرحو شعرهم

انا عايزة اركب عربية السيدات اللي بتطلع فيها واحده تبيع دبابيس حجاب بنص جنيه واقلام تحديد باتنين جنيه

وعلى راي نيللي زمان

حقققققققققققققققققيييييييييييييييييييييي ومافرطفوهشي

أنا

من الشتايم اللي كانت يحلى لأمي تشتمني بيها لما اعمل أو أقول حاجة ما تعجبهاش

جاك حل وسطك

مع اني مش عارفة ايه علاقة وسطي باللي أنا عملته

كبرت انا وبطلت أمي تشتمني وتقرصني .. الحمد لله

بس لقيت نفس المصطلح بيتردد قدامي

مع تغيير بسيط في التشكيل

وكمان لقيت نفسي عايشة بيه

حل وسط ..

مالا يدرك كله لا يترك كله

مسك العصايا من النص

الرقص عالسلم

الدنيا ما تتاخدش أفش

كل دي مترادفات لسياسة واحده مافيش غيرها قدامي في الحياه

كانها قانون ولازم اطبقه

وإلا.. العواقب هتكون درامية قوي

يا اما اتنازل تماما عن اللي عايزة اعمله

يا اما الجا لحل وسط يرضي جميع الاطراف

ومش انا بس.. الدنيا كلها على ده الحال

والامثلة كتيييييييييييير